مشاكل المكياج و حلها (اسرار و معلومات و نصائح)

من طرف ???? 5/10/2010, 8:33 pm

الاساس (الفونديشن) :

1- كريم الاساس الحلو هو اللي يكون مناسب لون بشرتك بحيث يكون نفس الدرجه
او اقل (او اكثر ) منها درجتين غير كدا هيبقى شكله مش طبيعي , و يفضل ان كريم الاساس يكون خفيف .
2- لاخفاء العيوب : يجب استخدام مخفي العيوب (الكونسيلر) عشان هو ضروري في المكياج و بتجيبي كونسيلر نفس لون البشره و بتحطيه على اماكن العيوب , و حول الانف لاخفاء الاحمرار .
3- الهدف من الاساس هو توحيد لون البشره : بتجيبي كونسيلر افتح بدرجه او اتنين من لون بشره و بيتحط حولين العين لاخفاء الهالات السودا و حولين الفم لأن المنطقه دي تكون اغمق من باقي البشره ( السبب هو ان المنطقه دي بيجي عليها اكل فـ بتلتهب و تحمر و بعد كدا تغمق ) .
4- خلى بالك الكونسيلر تقيل و بيستمر فتره اطول من كريم الاساس فـ إتأكدي من وضعه بطريقه مناسبه و مظبوطه .
5- يجب تثبيت الاساس السائل او الكريم بالبودره و خصوصا في الصيف عشان الحر و الرطوبه و العرق و كل العوامل دي بتخلي المكياج مش يثبت , الحل هو وضع البودره بعد الكريم عشان يستمر فتره اطول
لاكن في الشتا الجو بيبقى برد و البشره بتبقى جافه ( لازم تشربي ميا كتير للمحافظه على جمال و رونق بشرتك )
فـ يفضل وضع الكريم المرطب قبل كريم الاساس و التقليل من كميه البودره عشان البودره بتدي مظهر جاف .
6- يفضل عدم وضع كريم الاساس في الصيف في الشمس عشان بيسد المسام و بيضر البشره و البودره المائيه هي الانسب في نهار الصيف لانها بتستمر فتره اطول حتى مع العرق , احرصي على اختيار لون البورده المائيه الاقرب للون بشرتك لان منظر البودره المائيه الغير مناسبه بيبقى مش جميل ( و كمان الرجال مش بيحبو منظر البورده المائيه التقيل او الفاتح اوي و بيعتبرو البنت اللي بتعمل كدا غير طبيعيه و غير واثقه في نفسها )
لاكن كريم الاساس هو مناسب اكتر في الشتا لانه بيدي منظر البشره الصحيه الرطبه ابتسام جميل .
7- اتأكدي من تناسب لون الوش مع الرقبه .

ظلال العيون ( الآي شادو ) :

1- استخدمي الالوان الفاتحه في النهار و قللي من اللون الاسود .
2- استخدمي الاوان الفاتحه في الداخل (المنطقه الاقرب من الأنف) و الالوان الغامقه في الخارج .
3- وضع القليل من اللون الابيض في المنطقه الداخليه من الجفن و تحت الحاجب .
4- للعين الضيقه قللي من الالوان الغامقه .
5- لون الضل النحاسي البرتقالي بيبرز لون العيون الزرقا
لون الضل البنفسجي بيرز لون العيون الخضرا و العسلي
لون الضل الاخضر بيبرز لون العيون العسلي
فاختاري لون الضل المناسب مع لون عيونك .

الكحل :

1- للعيون الضيقه استخدمي الكحل البيض داخل العين و الاسود حول العين ( و يفضل الوان غير الاسود زي الازرق , الاخضر , او البني ) .
2- لو بشرتك فاتحه و شعرك اشقر ممكن يكون اللون الاسود في الكحل مش لايق عليكي استخدمي الكحل البني ممكن يكون مناسب ليكي اكتر .
3- لو عنيكي واسعه حطي كحل الاسود داخل العين و قللي منه خارج العين عشان بيكبر العين و يخليها جاحظه اكتر .
4- الكحل بيسيح ؟ حطي عليه آي شادو بنفس اللون و هيستمر فتره اطول ابتسام جميل

الماسكرا :

قللي من استخدام الماسكرا الووتر بروف (ضد الميا ) عشان صعب انك تشيلها و دا شيء مش كويس لصحه الرموش .

الشفايف :

1- حطي بودره على شفايفك قبل ما تحطي روج بيساعد على تثبيت الروج فتره اطول .
2- لو شفايف مليانه حاسه ان الروج عليها بيخلي شكلها اكبر و مش جميل ؟
الحل : حطي كونسيلر و بورده على شفايفك دا بيلغى لونها و بيبرز لون الروج اكتر و بعدين حطي الروج من جوا الشفايف بس و اهم حاجه متستعمليش روج بيلمع او جلوس لانه بيدي منظر شفايف مليان اكتر , و متسمعيش كلام حد يقولك حطي الوان فاتحه بالعكس حطي الوان غامقه لانها بتصغر الشفايف .
3- لو شفايفك صغيره حددي شفايفك بمحدد غامق (بس ارجوكي حطي المحدد على الشفايف كلها , مش من برا بس
عصر المحدد اللي من برا بس دا انتهى من زمااااااان) بعدين حطي روج افتح من المحدد في الشفايف من جوا بس
بحيث الشفايف تبقى غامقه من برا و فاتحه من جوا ( بس ميكونش المنظر زياده عن اللزوم , يعني الاختلاف ميكنش باين اوي ) و بعدين انهي المنظر بـ ملمع شفايف ( جلوس) على الشفايف كلها او في منتصفها بس ( استخدمي الالوان الفاقعه في الروج عشان بتكبر الشفايف و قللي من الاوان الغامقه عشان بتصغرها ) .
4- لو عايزه مكياج عيونك يظهر اكتر استخدمي لون روج فاتح و محايد
لاكن لو مكياج عيونك خفيف ممكن تستخدمي الوان الروج الغامقه و الفاقعه .

الخدود :

1- لو خدودك صغيره حطي احمر الخدود ( الروجاجو او البلاش ) على الخدود من الداخل ( المنطقه الاقرب من الأنف )
دا بيساعد على ابرازها .
2- لو خدودك مليانه استخدمي احمر الخدود تحت عظمه الخد .
3- احرصي على وضع احمر الخدود لأنه بيدي رونق و مظهر صحي للوش .

وأخيرا :

قللي من استخدام المكياج لأنه مضر للبشره و بيسرع من العجز و خصوصا حولين العين عشان منطقه حساسه فخلي بالك من التعامل معاها
و احرصي انك تزيلي المكياج في اخر اليوم ( عن طريق استخدام مزيلات المكياج او اي كريم مرطب و قطنه )
و متناميش و المكياج على وشك عشان دا مش كويس عشان البشره
بل استخدمي الماسكات المرطبه قبل النوم دا انسب وقت لاستخدامها .